ﻧﻈﻴﻔﻪ ﻭ ﺍﻟﻬﺎ ﺳﻮﺩ ﺍﺭﻣﺎﺵ ؛؛ ﺍﺗﻘﻮﻝ ﺍﻛﻼﺵ ؛؛
ﻫﻮﺍﺭﻱ ﺩﺍﺭﻟﻲ ﻓﺎﻟﺠﺎﺵ
ﻧﻈﻴﻔﻪ ﻭ ﻟﻬﺎ ﺯﻳﻦ ﺍﻭ ﻗﺪ ؛؛ ﺍﻭ ﺻﻴﻔﺔ ﺧﺪ ؛؛ ﺍﻓﻼﺵ ﻣﻊ ﺻﻮﺍﺭ ﻭﻗﺪ
ﺍﻭ ﻋﻴﻦ ﺍﺗﻘﻮﻝ ﻏﺰﺍﻝ ﺷﺮﺩ ؛؛ ﺍﻭ ﺧﺶ ﺍﻫﺮﺍﺵ ؛؛ ﻣﻊ ﺻﻴﺎﺩﻩ ﻣﺎ ﻗﺪﺭﺍﺵ
ﺃﺗﺴﻔﻲ ﻓﻲ ﻣﻤﺸﻮﻁ ﺍﺳﻮﺩ ؛؛ ﺍﺟﻨﻮﺩ ﺍﺣﺒﺎﺵ ؛؛ ﻋﻠﻴﻬﻢ ﺗﺠﻬﻴﺰﺍﺕ ﺍﺩﺑﺎﺵ
ﺻﻌﻴﺒﻪ ﻣﺎ ﻳﻠﺤﻘﻬﺎ ﺣﺪ ؛؛ ﺍﻟﻠﻲ ﻋﻴﺎﺵ ؛؛ ﺍﻟﻬﻲ ﻗﻬﻮﺍﺟﻲ ﻣﺎ ﺗﺎﺑﺶ
ﺇﺗﺮﻳﺪ ﺍﻟﻠﻲ ﻋﺪﻩ ﺍﻭ ﻋﺪﺩ ؛؛ ﺍﻭ ﻣﺎ ﻫﻤﺎﺵ ؛؛ ﺍﺷﺮﻭﻁ ﻣﻬﺮﻫﺎ ﻳﺪﻓﻊ ﻛﺎﺵ
ﺃﺣﺴﺎﺑﻪ ﺑﺎﻟﻤﻠﻴﻮﻥ ﺍﻳﻌﺪ ؛؛ ﺍﻭ ﻛﻢ ﺍﺣﻴﺎﺵ ؛؛ ﺣﻜﻮﻣﺔ ﺗﻨﻔﺦ ﻓﻴﻪ ﺑﻼﺵ
. ﻧﻈﻴﻔﻪ ﻭ ﺍﻟﻬﺎ ﺳﻮﺩ ﺍﺭﻣﺎﺵ ؛؛ ﺍﺗﻘﻮﻝ ﺍﻛﻼﺵ ؛؛
ﻫﻮﺍﺭﻱ ﺩﺍﺭﻟﻲ ﻓﺎﻟﺠﺎﺵ
ﻧﻈﻴﻔﻪ ﻭﺍﻟﻬﻲ ﺷﺒﺖ ﻋﻴﻦ ؛؛ ﺍﻟﻬﻲ ﺗﻈﻨﻴﻦ ؛؛ ﺍﻟﻠﻲ ﻣﺠﺎﺗﻪ ﺑﻴﻦ ﺍﻭ ﺑﻴﻦ
ﺍﻧﻤﻮﺕ ﺍﻭ ﻧﺒﺪﺍ ﺻﺎﺣﺐ ﺩﻳﻦ ؛؛ ﺍﻥ ﻭﻟﺪﻱ ﻋﺎﺵ ؛؛ ﺍﻳﻄﺎﻟﺐ ﺗﺎﺭﻱ ﻻ ﻋﻼﺍﺵ
ﻣﻦ ﺍﻟﻠﻲ ﻟﺒﺴﺖ ﺑﻮﻃﺮﻓﻴﻦ ؛؛ ﺃﺗﻘﻮﻝ ﺍﻓﻼﺵ ؛؛ ﻋﻈﺎﻫﺎ ﻣﻦ ﻳﺎﻻ ﻟﻘﻤﺎﺵ
ﺍﺗﺨﻒ ﺍﻟﻠﻲ ﻟﻪ ﻋﻘﻞ ﺭﺯﻳﻦ ؛؛ ﺍﻳﺠﻴﻪ ﺃﻏﺸﺎﺵ ؛؛ ﺍﻥ ﺗﺎﻗﺖ ﺑﺎﻟﻤﺸﻴﺔ ﺩﻭﺩﺍﺵ
ﺯﻋﻴﻢ ﺍﻋﺮﻭﺑﻪ ﻃﺎﻟﻊ ﻭﻳﻦ ؛؛ ﺍﺭﻳﺪ ﻧﻘﺎﺵ ؛؛ ﺩﻭﻝ ﺣﻠﻒ ﺍﻟﻨﻴﺘﻮ ﻟﻄﻨﺎﺵ
ﺍﻣﻌﻠﻘﻬﻦ ﺷﻮﻕ ﻃﻮﺍﺷﻴﻦ ؛؛ ﺍﻧﻈﺮ ﻗﺪﺍﺵ ؛؛ ﺍﻭﺳﺎﻣﺎﺗﻪ ﻋﺸﺮﻩ ﻭﺍﺣﺪﺍﺵ
ﻧﻈﻴﻔﻪ ﻭ ﺍﻟﻬﺎ ﺳﻮﺩ ﺍﺭﻣﺎﺵ ؛؛ ﺍﺗﻘﻮﻝ ﺍﻛﻼﺵ ؛؛
ﻫﻮﺍﺭﻱ ﺩﺍﺭﻟﻲ ﻓﺎﻟﺠﺎﺵ
الشاعر ﺩﻛﺎﻡ ﻋﻠﻲ ﺩﻛﺎﻡ
من منطقة الشويرف
ليست هناك تعليقات:
إرسال تعليق